Hvat er Fab Lab?
Fab Lab
Fab Lab er ein verkstova við tøkni og tólum til at gera nærum, hvat sum helst. Fab Lab smiðjan gevur ungum sum eldri, einstaklingum eins og fyritøkum møguleikan at menna skapanarevnini og fullføra hugskot við at sniðgeva, seta saman og framleiða við hjálp av talgildari tøkni.
Fab Lab kemur av ensku orðunum Fabrication Laboratory ella framleiðsluverkstova.
Fab Lab hevur røtur sínar í Center for Bits and Atoms á MIT universitetinum í Massachusetts í USA. Tað var leiðarin har, Neil Gershenfeld, sum umframt at granska í evninum eisini skapti fakið “How to Make (Almost) Anything” á MIT, ið síðani leiddi til Fab Lab hugsjónina.
Fab Lab á Kambsdali er fyrsta góðkenda Fab Lab í Føroyum. Harvið eru Føroyar knýttar í eitt netverk, sum røkkur kring allar 24 tíðarsonurnar og út til fleiri enn 100 lond. Í dag eru umleið 1100 Fab Lab verkstovur knýttar í netverkið.
Karmar
Fab Lab er ein lítil framleiðsluverkstova, sum stuðlar undir framleiðslu í smáum nøgdum við denti á arbeiði við prototypum.
Tólini verða øll stýrd av teldum, og tú lærir at nýta tólini eftir tørvi. Nakrar teldur eru tøkar á Fab Lab, men tú kanst eins væl nýta tína egna teldu til t.d. tekningar. Forritini vit nýta til myndaviðgerð og tekningar eru ókeypis og kunnu takast niður av netinum. Kom og royn teg – kanska tú fært góð hugskot.
